1 Хомустахская федеральная сельская модельная библиотека нового поколения «Эйгэ»

«Ааҕар эйгэ» сайыҥҥы сахалыы ааҕыы лааҕырбытын бэс ыйын 1 күнүттэн саҕалаатыбыт. Лааҕыр сыала-соруга: оҕолору уус-уран ааҕыыга угуйуу, оҕо сахалыы ааҕар сатабылын сайыннарыы.

Лааҕырбытыгар Д.Ф. Алексеев аатынан 1 Хомустаах орто оскуолатын 5 кылааһын үөрэнээччилэрэ сылдьаллар. Бу кэм устата оҕолор сахалыы айымньылары билсиэхтэрэ, аахпыттарын кэпсиэхтэрэ, ырытыахтара, ону таһынан дьыктаан, өйтөн суруйуу, дорҕоонноох ааҕыылар, интеллектуальнай күрэхтэр, историческай-литературнай квест оонньуулар ыытыллыахтара. Оҕо көмүскэлин күнүгэр А.Н. Окоемов аатынан мини-пааркаҕа нэһилиэк иһинэн тэриллибит лааҕырдар аһыллыылара буолла. «Эйгэ» саҥа көлүөнэ иһинэн үлэлиир лааҕырбытын билиһиннэрдибит, кыттыыны ыла кэлбит оҕолорго «Остуоруйа дьикти дойдута» викторина күрэҕин ыыттыбыт. Кыайыылаахтарынан Дьячковская Алиана, Васильева Сайаана, Ефремов Эрсан буоллулар. Ити күн библиотекаҕа «Алаа Моҕус уонна Чаачахаан»саха норуотун остуоруйатын, Россияҕа Норуоттар сомоҕолоһууларын уонна Саха сиригэр Культура сылын чэрчитинэн «К истокам народной культуры России» кинигэ быыстапкатын билистилэр, ырыттылар.

Бэс ыйын 2 күнэ — Саха норуодунай суруйааччыта Н.Е. Мординов-Амма Аччыгыйа төрөөбүтэ 120 сылыгар аналлаах «Улуу дьол ааҕарга баар…» библиотечнай уруок күнэ. Манна суруйааччы олоҕун, айар үлэтин кэпсээтибит. Оҕолор “Тоҕус төгүл “тоҕо?” айымньы тэттик видеотын сэҥээрэ көрдүлэр, “Төрдүс «тоҕо?” кэпсээнин ырытан, айымньы туһунан бэйэлэрин санааларын суруйарга холоннулар, уруһуйдаатылар.

Бэс ыйын 3 күнэ — Аан дойдуга Велосипед күнүнэн «По историческим улицам  родного села» вело-квест оонньуу ыытылынна. Оҕолор үс хамаандаҕа араҕыстылар: Заровняев Айхал командирдаах «Уруй-Айхал», Сивцев Мичил командирдаах «Мичил», Николаев Тимур командирдаах «Черемша» хамаандалар кытыннылар. Ол курдук ребус таайыыта, көппүт буукубалары сөпкө туруортааһын, Аҕа дойду сэриитин ветеранын дьиэтин булуу, нэһилиэкпит Өрөгөй ырыатын авторын кытары көрсүү, ону таһынан эко-задание толорон бөх-сыыс хомуйдулар. Оонньуу сорудахтарын барытын сөпкө толорон «Мичил» хамаанда кыайыылааҕынан таҕыста. Самаан сайын кэлбитинэн, ыһыахтар чугаһаабыттарынан «Ыһыах» диэн дьыктаан суруйдулар.