1 Хомустахская федеральная сельская модельная библиотека нового поколения «Эйгэ»

Тохсунньу 29 күнүгэр — уоттаах сэрии Кыайыынан түмүктэммит үөрүүлээх Кыайыы күнүгэр диэри 100 хонук хаалбыт күнэ «Алгыс» норуот айымньытын киинигэр бэлиэтэннэ.
Уоттаах сэриигэ, тыылга Кыайыыны уһансыбыт биир дойдулаахтарбыт ааттарын үйэтитэр сыаллаах нэһилиэкпитигэр тахсыбыт кинигэлэри билсиһиннэрэр «Улуу Кыайыы ытык өйдөбүлэ» кинигэ быыстапката турда.
Тэрээһини Д.Ф. Алексеев аат. 8 кылааһын орто оскуолатын үөрэнээччилэрэ Улуу Кыайыы бэлиэтин — Кыайыы Знамятын күөрэччи көтөҕөн киллэрэн саҕалаатылар.
Бу күн биһиги эбэлэрбит, эһэлэрбит — тыыл ветераннара, сэрии сылын оҕолоро бочуоттаах ыалдьыт буолан чиэстэннилэр. Күндү ветераннарга махтанан, сүгүрүйэн туран нэһилиэк тэрилтэлэрин ааттарыттан  бэлиэ күнүнэн сибэкки дьөрбөтө, сэмэй бэлэх уонна  «Сайдыы» оҕо айымньытын дьиэтин иитиллээччилэрэ бэйэлэрин илиилэринэн оҥорбут “Кыайыы значоктара” туттарылынна. 
Эҕэрдэ тылларын эттилэр  “Хомустаах 1-кы нэһилиэгэ” МТ баһылыга Жирков В. Г., нэһилиэк ветераннарын сэбиэтин  бэрэссэдээтэлэ   Ощепкова З .Е.   Аҕа дойду Улуу сэриитин уоттаах толоонуттан эргиллибэтэх уонна билиҥҥи кэмҥэ буола турар анал байыаннай дьайыыга сырдык тыыннарын толук уурбут, эйэлээх олох иһин турууласпыт биир дойдулаахтарбыт сырдык кэриэстэригэр сүгүрүйэн туран биир мүнүүтэлээх чуумпуруу буолла. «Мичээр» оҕо үҥкүү ансаамбылын оҕолоро үҥкүүнэн, оскуола үөрэнээччилэрэ ырыанан, хоһоонунан киэргэттилэр. Ол кэннэ көрөөччүлэр киинэ архыыбыттан нэһилиэкпит Кыайыы 40 сыллаах юбилейнай парадын сэҥээрэ, астына көрдүлэр. Тэрээһин түмүгэр  «Эйэ-дьол иһин»  күргүөмүнэн ылланна, бэлиэ түгэни уопсай хаартыскаҕа түһэрэн үйэтиттилэр.