1 Хомустахская федеральная сельская модельная библиотека нового поколения «Эйгэ»

Быйылгы сыл нэһилиэкпитигэр ҮЛЭ уонна БИГЭ ТУРУК сылынан биллэриллибитэ. Ол чэрчитинэн «Эйгэ» саҥа көлүөнэ библиотеката олунньу 25 күнүттэн са5алаан түөлбэлэр икки ардыларыгар “ӨЙ-ТОЛКУЙ” интеллектуальнай коммерческай күрэх бастакы оонньуутун ыытта. Хас биирдии түөлбэттэн 5 оонньооччулаах «Чагда» (сал. Барашкова А.К.), «Дьулуур» (сал. Сысолятина М.П.), «Кустук» (сал. Руфова Е.И.), «Саһарҕа» (сал. Сысолятина Н.Р.) уонна «Үрдэл» (сал. Лиханов Р.А.) көхтөөх кыттыыны ыллылар. Бастакы оонньуу «Кини кимий?» хаартысканан таайыы буолла. Кыттааччылар 1, 2, 3 түһүмэҕи ааһаннар, финалга «Чагда» уонна «Дьулуур» хамаандалара күөн көрүстүлэр. Уопсай түмүккэ 1100 бааллаах «Дьулуур» түөлбэ кыайыылаах аатын ылла. «Чагда» 775, «Кустук» 450, «Саһарҕа» 150 уонна «Үрдэл» 25 баалы ыллылар.

Санатан эттэххэ, бу күрэх сыл устата барыаҕа. Иккис кварталга «Нам улууһун история кэрчиктэрэ» оонньуу («Своя игра»), үһүс кварталга «Хаһан? Ханна? Хайдах?» (Брейн-ринг) уонна төрдүс кварталга — «Өркөн өй» оонньуунан түмүктэниэҕэ.

Күрэххэ кыттыбыт нэһилиэкпит түөлбэтин көхтөөх кыттааччыларыгар уонна салайааччыларыгар барҕа махталбытын тиэрдэбит!