1 Хомустахская федеральная сельская модельная библиотека нового поколения «Эйгэ»

Татаринов Алексей Михайлович – Удьурҕай СӨ суруйааччыларын Сойууһун чилиэнэ, Нам улууһун «Отуу уота» уран сурук түмсүүтүн салайааччыта, «Туллук хаара» ырыа айааччылар, «Алгыс» олоҥхоһуттар, нэһилиэк “Төлөн” лит. түмсүүлэрин чилиэннэрэ, РФ үөрэҕириитин туйгуна, “Саха-Азия оҕолоро” фонд стипендиата, мелодист, мас, тимир ууһа.

Нам оройуонун Үөдэй нэһилиэгэр олунньу 7 күнүгэр 1960 сыллаахха төрөөбүтэ, 1 Хомустаах олохтооҕо. Нам педучилищетын, СГУ ПИ салаатын бүтэрбитэ. Үөдэй, 1 Хомустаах оскуолаларыгар идэтинэн учууталлаабыта.
2016 сыллаахтан бэчээттэнэр, хоһоонноро “Күрүлгэн”, “Чолбон”, “Үйэ”, “Байанай” сурунаалларга, “Кыым”, “Киин куорат”, “Эҥсиэли”. “ Үөһээ Бүлүү”, “Таатта” уонна Кэбээйитээҕи “Дабаан”
хаһыаттарга бэчээттэммиттэрэ. 2018 сыллаахха “Мин иэйиим сэбирдэх ыһыаҕа”, “Алааһым кустугун
дьэргэтиэм”, “Айар абылаҥ аартыга” , 2020 сыллаахха “Тылтан тыллар тыллаллар”, “Көмүлүөгүм иннигэр…”, 2023 сыллаахха оҕолорго аналлаах “Сахалыы оонньуурдар” хоһооннорун кинигэлэрэ күн сирин көрбүттэрэ. Аныгы ситим хоһоонньуттарын түмсүүлэрин “Айар кут”, “Хоһоон хонуута”, “Тыл сүмэтэ”, “Тапталтан тыллыбыт иэйиилэр” хомурунньуктарыгар хоһоонноро киирбиттэрэ.
“Литературный пикник-2019” республикатааҕы хоһоон күрэһигэр Өлүөнэ өрүһү хоһуйуута II миэстэни, тута хоһуйууга II миэстэни, хоһоонньуттар “Сахалыы тыынынан” түмсүүлэригэр акро-хоһоон күрэһигэр I миэстэни, “Дьөһөгөй оҕото” хоһоон күрэһигэр “Тойон хоһоонньут” аатын ылбыта.
Удьурҕай хоһоонноругар 93 ырыа айыллан дьон-сэргэ сэҥээриитин ыллылар. «Саҥа ырыа» күрэххэ, “Тэтим”, “Виктория”, “Эҥсиэли” араадьыйаларга, ситим нөҥүө тарҕанан ылланаллар. Кини ырыа буолбут хоһоонноро «Үрдэл-2021», «Үрдэл-2022», «Үрдэл-2024» Саха НКИХ национальнай музыкальнай бириэмийэтин лауреаттара.

Уб. Алексей Михайлович! Олоҕун кэрэ-бэлиэ кэминэн, өрөгөйдөөх үбүлүөйгүнэн ис сүрэхтэн истиҥник эҕэрдэлиибит! Айар талааныҥ сылтан сыл аайы саха алмааһын курдук чочуллан истин, айымньылаах үлэҥ дьону-сэргэни үтүөҕэ-кэрэҕэ кынаттаатын! Эн өйгүн-санааҕын, билиигин-көрүүгүн түмэн, дьоҕургун биэрэн, бар дьонуҥ ытыктабылын ылан айар үлэ үөһүгэр үлэлии-хамсыы сылдьаргынан киэн туттабыт! Саҥаттан саҥа ситиһии, сонунтан сонун арыйыы, сүргэҕин көтөҕөн, санааҕын кынаттаан, үрдүктэн үрдүккэ көтүтэ туруохтун. Эйиэхэ уонна дьиэ кэргэҥҥэр мэлдьи ситиһии эрэ эҥээрдэстин, куруук дьол-соргу эрэ тосхойдун диэн алгыс тылбытын аныыбыт!