К.И. Еремеев-Тилин 75 сылыгар аналлаах «Күн сырдыгын анныгар» диэн литературнай ахтыы

31.10.2024
86
нет

Новости

Алтынньы ый 29 күнүгэр олохтоох автор, РФ журналистарын Союһун чилиэнэ, общественнай корресподент, Мэҥэ Хаҥалас Моорук нэһилиэгин бочуоттаах олохтооҕо Константин Иванович Еремеев-Тилин 2020 сыллаахха тахсыбыт «Күн сырдыгын анныгар” кинигэтин аатынан ахтыы литературнай чааһа буолан ааста.

Сытыы бөрүөлээх журналиспыт Көстөкүүн Уйбаанабыс-Тилин баара эбитэ буоллар, быйыл балаҕан ыйын 29 күнүгэр 75 сааһын туолуохтаах этэ.

Бу күн олохтоох администрацияттан “Хомустаах 1-кы нэһилиэгэ” МТ депутаттарын Сэбиэтин салайааччыта Николаев Ю.А., Г.К. Эверстов-Тыыппалаах, нэьилиэк инбэлииттэрин уопсастыбатын салайааччыта Березкина Т.А. уонна кини олоҕун аргыһа, кэргэнэ Мария Павловна Николаева-Еремеева уонна аймахтара ыалдьыттаатылар.

Литературнай чааһы иилээн-саҕалаан ыытта улуустааҕы “Отуу уота” литературнай түмсүү салайааччы А.М. Татаринов-Удьурҕай.
Көстөкүүн Уйбаанабыс кылгас кэм иһигэр 6 кинигэни утуу-субуу көччөх гынан көтүппүтэ.
Инники тахсыбыт кинигэлэригэр дьонугар-сэргэтигэр билиһиннэрэр сыаллаах биһирэм оҥорон турабыт. Онтон бу бүтэһик «Күн сирин анныгар» кинигэтэ хааччах кэмигэр тахсан ыытыллыбакка хаалбыта.

Бу кинигэлэргэ түмүллүбүт кэпсээннэр тыа сирин олохтооҕун хараҕынан суруллубуттар.
Тыа сирин дьиҥнээх олоҕун ис кутун, истиҥ иэйиитин көрөдөрөллөр.
Араас майгылаах уонна дьылҕалаах персонажтарынан ааспыты уонна бүгүҥҥү күнү кэпсииллэр. Кинигэлэрэ тугу кэпсииллэрин ааттара толору арыйаллар, сэһэргииллэр.
Ол курдук олох эриэннэрэ, мөккүөрдэрэ, иирбэ-таарба өрүттэрэ тыа сирин киһитин хараҕынан итэҕэтиилээхтик ойуулананаллар.
Төрөөбүт тыатын сирин дьонун олоҕо уу судургу, киэҥ-холку киэптээхтик суруллубуттар. Кинигэлэр бары ааҕааччы киэн эйгэтигэр ананаллар.

Тилин общественнай корреспондент быһыытынан атыттартан сүрүн уратылааҕа. Суруйуулара сытыы тыллаахтар, эҕэлээх ис хоһоонноохтор, сырдык юмордаахтар, көрдөөх эрээри чыпчаххай кэриэтэ кымньыылыыр сатирическай формалаахтар. Баар кырдьыгы, итэҕэһи-быһаҕаһы этэриттэн куттаммат этэ.

Салгыы ыалдьыттар иннилэригэр Д.Ф.Алексеев аатынан 1 Хомустаах орто оскуолатын үөрэнээччилэрэ ааптар хоһоонун аахтылар. Сардаана Тумусова “Үс хатыҥ” ырыаны ыллаан иһитиннэрдэ, көр-күлүү бөлөҕө “Мэскэйдэр” артыыстара Соловьева Татьяна уонна Ермолаев Алексей “Менеджер” диэн сценканы оонньоон көрдөрдүлэр. Тэрээһиммит бүтэһик чааһыгар сахалыы минньигэс астаах остуол тула олорон истиҥник дуоһуйа кэпсэтэн, Тилини ахтан-санаан, бары санааларын сайа этэн, дуоһуйан тарҕастылар.